窺探愛犬甜蜜心事 關心妍Yogi戀情曝光

2006-03-08
太陽報 娛聞

不少藝人喜愛飼養小狗當寵物,但由於工作繁忙,往往沒有時間與牠們溝通,反而不少寵物原來十分關心主人呢!例如關心妍飼養近五年的貴婦狗Yogi,經動物溝通專家Rosina了解後,發現牠對主人的一切非常清楚,更把自己當成她的男友呢!

關心妍(Jade)抱著愛犬Yogi來到拍攝場地,Yogi一開始已好奇與緊張得通處走,專家Rosina像已感應到牠的內心,對Jade說︰「你平時梗係好少帶Yogi出街玩呢?」Jade尷尬地笑說︰「係呀!佢好少出街,即使平日o係屋企,都係媽咪同工人照顧佢多o的,因為我太忙喇!」

其後, Jade進入洗手間換衫,在短短的時間內,Yogi的行為已令Rosina明白牠非常疼愛主人,因為牠一直在洗手間門外等候Jade,並細細聲地叫著, Rosina說︰「佢話要等主人出o黎,見唔到Jade都唔會安樂!」Jade打開門後,Yogi真的不再叫,更乖乖地跟隨主人走到另一邊,一起坐下來聊天。

R︰Rosina J︰Jade

R︰你記住如果第時拍拖,一定要同Yogi講,因為佢好錫你,基本上佢覺得佢先係你生命中o既男人,除o左當你係好朋友,甚至當自己係你男朋友添!

J︰o下!係咩!咁我點樣先可以令佢開心o的?因為有時我帶佢去Party,佢都唔會同其他狗玩。

R︰(望望Yogi說)佢冇當自己係狗,所以唔鍾意同其他狗仔玩,佢最鍾意同你一齊,總之只要同你一齊,佢就會開心o架喇!

J︰不過我覺得佢有時好懶去學o野。

R︰佢好似人咁,唔想學新o野。如果想佢學,首先要同佢講清楚,其實佢好聰明,要教佢就要用教人o既方式,要畀佢知你要教佢咩,佢要知道發生緊咩事。

J︰我應該用咩語言同Yogi溝通?

R︰狗識好多語言,不過通常我都會叫狗主用番本身o既母語去教,咁樣會容易溝通o的。其實Yogi冇咩投訴,佢好乖,係一隻好開心o既狗,佢知自己有好好o既生活,知道自己充滿愛,佢同你同工人都好夾。

J︰但有時Yogi會發脾氣,我有個親戚好細個,Yogi見到佢就會想咬佢,但Yogi見到我公公,會好錫公公喎!

R︰係呀!因為佢知道公公係老人家,識得錫佢,佢最鍾意就係人人都Under佢Control,但你係咪成日喊呢?

J︰係呀!之前一排因為唔開心,有一段時間成日喊喎!

R︰Yogi話我知你成日唔開心,你下次再有唔開心就同Yogi講,記得最後要同佢講聲「件事過去o左喇!我都冇事,Yogi都要忘記喇!」如果你冇咁樣同佢講,佢會成日將件事放o係心度,成日都會諗起!Yogi知道你o既事,仲多過你媽咪喎!

J︰o下!係咩!咁佢會唔會嬲我成日咁忙,冇時間陪佢?

R︰嬲就唔會,但以後你要出去工作,最好出門前同佢講聲,再畀一樣你o既物件佢,叫佢幫你保管住,等你返屋企,咁樣佢會覺得有個責任,會乖乖o地o係屋企等你。

J︰佢有幾多歲命?

R︰佢應該會有12至15歲命,但呢個時候好難講,佢知你錫佢,老o左都會盡量Keep住自己身體。動物同人類唔同o既地方,就係動物可以感應到自己幾時會離開,人類就唔知。

J︰如果我將來結婚生BB,Yogi會唔會呷醋?

R︰都會,所以你要同佢講你會生BB,佢都明白咩係BB o架!

J︰其實狗會唔會唔畀你同佢溝通o架?

R︰狗比較少唔想溝通,貓就會,佢會令我覺得有「我冇o野想同你講」o既感覺。不過,唔同o既動物要用唔同o既方法同佢o地溝通,狗好聰明,好多科學解釋唔到o既o野,佢o地都感應到!

關心妍:幾準喎!

事後,記者問Jade認為Rosina所言是否準確,她說︰「都幾準喎!佢講Yogi o既性格都講得幾o岩,仲有佢o係Yogi身上睇得出我之前唔開心,又o岩喎!我上年真係幾唔開心,真係有同Yogi講過,o係佢面前喊過,但我以後會記住同Yogi呻完,要同佢講番『我講完就冇事喇!你都唔好唔開心,唔好再記得,要忘記我頭先講過o既o野!』,因為我唔想Yogi好似我咁唔開心嘛!」

心靈溝通助有心主人

Rosina Maria Arquati不但喜歡小動物,更懂得與牠們作心靈溝通,不需用言語已明白不同小動物的想法。現在,Rosina不但成為寵物與主人的溝通媒介,更開設名為「寵密語」的課堂,傳授與寵物溝通的技巧給有心人士,指導他們與寵物相處。她說︰「每個人都可以同寵物溝通,最緊要有耐心同愛心,寵物可以感覺到主人o 既情緒。有時寵物仲可以感應外界o既力量,如果你帶寵物去睇屋,佢o地感覺到間屋有冇靈體,如果佢o地入到間屋好開心周圍走,就表示間屋冇任何事情發生過,如果佢o地唔肯入屋,多數間屋曾經有事發生。」

圖 1: Yogi十分活潑,不時扭計要關心妍陪牠玩心愛的波波。

204916932_ede936fb34_o.jpg

圖 2: Rosina(右)感覺到Yogi是一隻快樂的小狗,更當自己是關心妍的男朋友!

204903078_3327ab2ffd_o.jpg

圖 3: 只要關心妍在旁,Yogi便感到安心,玩也玩得特別盡興。

204903081_a49b1efe2f_o.jpg

圖 4: 關心妍已飼養Yogi近五年,每天完成工作後,她便會陪愛犬玩耍。

204903082_e402298cde_o.jpg

圖 5: Rosina(右)教關心妍分享心事後,要跟Yogi說聲「不要記在心上」,否則牠會不開心。

204903083_e4803c5438_o.jpg

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: